अनुपम, डॉ. ड्यांग होऊ नका...

* ज्ये*ष्ठ समाजसेवक अण्णा हजारे यांनी दिल्लीत केलेल्या
आंदोलनाला पाठींबा देण्यासाठी मुंबईच्या आझाद मैदानात एका कार्यक्रमाचे आयोजन
केले होते. त्यात फिल्मी दुनियेतील अनेक सिने कलावंत सहभागी झाले होते. त्यात
ज्येष्ठ अभिनेते अनुपम खेर उपस्थित होते.

अनुपम खेर यांचा परिचय आम्ही वेगळा देण्याची गरज नाही.

भारतीय चित्रपटसृष्टीमध्ये आजवर जे - जे महान कलावंत झाले,
त्या महान कलावंतांच्या यादीत अनुपम खेर हे नाव चांगलंच वरच्या यादीत आहे.
त्यांनी केलेल्या बहुरंगी भूमिका आणि त्यांचा कसदार अभिनय प्रेक्षकान्च्या मनात
कायम ठसलेला आहे. लोकांच्या मनावर अधिराज्य गाजवण्याचे सामर्थ्य फार कमी
कलावंतांमध्ये असते. ते कौतुक अनुपम खेर यांना लोकांनी भरभरून दिले आहे.
त्यांच्या जागी ते खरोखरच उत्तम अभिनेते आहेत, यात शंकाच नाही. त्यांचा ' मंथन
' मधील पुत्रमृत्यूने शोकविव्हल झालेला म्हातारा काय किंवा ' कर्मा ' मधील
अंगावर शहारे आणणारा डॉ.ड्यांग काय - सगळ्या भूमिका अभिनेता म्हणून लाजबाबच !

या कलावंताने आपले नैपुण्य असलेला अभिनयाचा प्रांत सोडून नको
तिथं घुसखोरीचा प्रयत्न केला आणि विनाकारण टीकेचा विषय होऊन बसला...

...अण्णांच्या संदर्भाने आयोजित मुंबईतील त्या कार्यक्रमात [
शुक्रवार, दि. ०८/०४/११ ] अनुपम खेर यांनी सार्वभौम भारताच्या महान
राज्यघटनेविषयी बरीच गरळ ओकली. ते म्हणाले,
" भारताचे संविधान जुने झाले आहे. ते फेकून देण्याच्या लायकीचे
आहे. आपण रोज चड्डी बदलतो, मग संविधान बदलण्यास काय हरकत आहे ? " *[ संदर्भ :*
*वृत्तरत्न सम्राट** दि.१०/०४/२०११ ].*

राज्यघटनेविषयी अशा प्रकारे बेजबाबदारीचे विधान करण्याची अनुपम
खेर यांची लायकी आहे का ? हा खरा प्रश्न आहे. राज्यघटनेविषयीचा त्यांचा अभ्यास
किती आहे ? ती त्यांनी पूर्ण वाचली तरी आहे का ? त्यांचा वकूब अभिनयात,
राज्यघटनेच्या अभ्यासकात कधी आला ?

बोलण्याचा अधिकार सर्वाना आहे, हे मान्य करूनही अनुपम सारख्या
पब्लिक फिगरने * *असे बेताल वक्तव्य करणे किती योग्य आहे, याचा विचार करणे
आवश्यक होते. केवळ डॉ.बाबासाहेब आंबेडकरांनी हे संविधान लिहिले आहे, या
जातमुलक विषारी भावनेतून खेर असे बोलले असतील तर ही दुर्दैवाचीच बाब आहे. अनुपम
खेरांचे विधान हे तत्कालीन आवेगातून आले असण्याचीही शक्यता आहे. अण्णांच्या
आंदोलनात सगळा देश सहभागी झाला होता. त्या अभिनिवेशात अनुपम खेर स्वतःवर आणि
भावनांवर नियंत्रण ठेऊ शकले नसावेत. नाहीतरी कलावंत हे संवेदनशील असतात असे आपण
मानतोच की.

अनुपम यांना भ्रष्ट व्यवस्थेविषयीची चीड असावी असे वाटते. तो
राग कोणावर काढायचा हे न समजल्यामुळे ते विष ओकून रिकामे झाले असावेत. आजच्या
या व्यवस्थेला संविधान जबाबदार नसून ते राबविणारे लोक जबाबदार आहेत, ही साधी
बाब त्यांच्या लक्षात आली नाही, एवढे त्यांचे राज्यघटनेविषयीचे अगाध ज्ञान आहे.

* * ही राज्यघटना देशाला बहाल करताना डॉ. बाबासाहेब
आंबेडकरम्हणाले होते,
* * " हे भारतीय संविधान कितीही चांगले असले तरी ते राबविणारे लोक
लायक नसतील तर हे संविधान कुचकामी ठरेल. "
* *
ही राज्यघटना सर्व स्तरातील लोकांची काळजी घ्यायला समर्थ आहे.
तिची तंतोतंत अंमलबजावणी केली तर हा देश महासत्ता व्हायला वेळ लागणार नाही.
मात्र ते कसे राबविले जाते ? किती खंबीर लोकांद्वारे राबविले जाते ? याचा
थोडातरी विचार अनुपम यांनी केला आहे, असे दिसत नाही.

कलावंतास जात, धर्म, पंथ हे असं काही नसतं. तो सर्व समाजाचा
असतो. म्हणूनच समाजसुद्धा जाती-पातीच्या पलीकडे जाऊन त्याच्यावर प्रेम करीत
असतो. आपल्याला ज्या विषयाचे ज्ञान नाही, त्यात शिरून उगीच बकबक करणे अनुपम
सारख्या तथाकथित 'बुद्धीजीवी' कलावंतास मुळीच शोभले नाही. त्यातही अत्यंत
खालच्या थरावर जाऊन बिभस्तपणे बरळणे निषेधार्हच आहे. हा देशाचा अपमान आहे.
अनुपम खेर यांना हे का समजले नाही ? कोण्या एखाद्या सनातनी राजकीय पक्षाला खुश
करून राजकारणातलं काहीबाही मिळवण्याच्या मोहात तर अनुपमने हा लाळघोटेपणा केला
नसेल ? त्यांनी देशाची माफी मागितलीच पाहिजे.

अनुपम खेर हा ' अनुपम ' कलावंत आहे. त्याची जागा रसिकांच्या
काळजात आहे. तिला त्यांनी बट्टा लाऊन घेऊ नये. कलावंताने कलावंतच राहावे. अनुपम
खेर यांनी ' अनुपम ' कलावंत राहावे, तेच रसिकांना आवडेल. त्यांनी ' डॉ.ड्यांग '
होऊ नये.

-*प्रा.बापू घोक्षे *